حرب اكتوبر تاني مرة
هذه المرة بقيادة طلعت السادات بدلا عن انور، وكانت ساحة المعركة على قناة دريم ، وشن طلعت هجوما عنيفا ضد مبارك وابنه جمال وصاحب ابنه عز ، وصف مبارك بأنه خبير عسكري جامد جدا ، أما في السياسة فلا يفقه شئ ، يعني عايز تقول يا طلعت انه " طور الله في برسيمه " .. هنا قاطعته منى الحسيني " اسفة للازعاج بس انا مليش دعوة يا استاذ طلعت مش عايزه ابات في قسم الدقي " على فكرة اسف للازعاج ده اسم البرنامج ، كل هذا ولا حاجه ، التقيل ورا ، ازاي يا استاذة منى تفسري ان واحد قاعد جنب السادات ولا يصيبه ولا رصاصة ولا شظية ولا حتى خدش ، دي مؤامرة ، انقلاب عسكري مصغر ، وكل الشعب المصري عارف كده مش انا بس 0
مين اللي كان قاعد جنب السادات يا استاذ طلعت ؟
ده السؤال اللي المذيعة الشاطرة جدا مسألتهوش
بس الناس كلها عارفه وشافته عالتي في
حسني مبارك طبعا
طيب وليه بتقلب المواجع يا استاذ طلعت
وديت نفسك في داهية
بالمناسبة اليوم تقرر محاكمة النائب طلعت السادات امام المدعي العام العسكري ، ولا تقولولي حرية رأي ولا تعبير ولا املاء0
بس ده نائب ومحصن
اه نسيت اقولك ، اول امبارح رفعوا عنه الحصانه ، اصل الحصانه دي تنفع في كمين مرور مع امين شرطه ، انما تنشال بسرعة الصاروخ لما تمس الكبار0
بلا حصانه بلا وجع دماغ
بلا حرية بلا ديمقراطيه
وداعا ايها السادات